2019/11/11
Dinamiken eta tailerren bitartez dibertsitatearen gaia landuko dute azaroren 23an Oiartzunen. Horretarako, bost kolektiboetako kideak izango dira bertan: Sorburu kooperatiba feminista, Garaipen Elkartea, Ilusionista Sozialak, Naizen, VEDI (Ventanas a la Diversidad) eta Haziak egitasmoa. Dibertsitatearen gaiari helduko diote guztiek, kolektibo bakoitzak bere eremu eta ikuspegitik.
Bi eremutan banatuko da Haziak Eguna. HAIZEA eremuan kultura herrikoiak eta emakumeak izango dira protagonista; URA eremuan, berriz, sexu-identitateek eta irudizko mugak jorratuko dituzte. Jardunaldia herritar orori zuzenduta dago, eta horregatik, URA eremuan haur eta familientzat tailerrak egingo dituzte egunean zehar.
Haziak Egunak helburu desberdinei erantzuten die, antolatzaileen esanetan. Dibertsitatearen gaira bide eta inguru desberdinetatik iristeko aukera izango dute parte hartzaileek, alde batetik. Gainera, norbanako eta kolektibo desberdineko kideek elkar ezagutzeko balioko du, baita dinamika berriak bizi eta martxan daudenak plazaratzeko aukera, besteak beste.
Egitarauari dagokionez, goizeko 10:00etatik 13:30etara aurkezpen ekitaldiak eta tailer eta dinamikek izango dute protagonismoa, Haurtzaro ikastolan. 14:00etatik aurrera bazkaltzeko aukera egongo da. Bazkaria Elizalde Herri Eskolan izango da, eta txartela 8 euroren truke eskuratu ahal izango da (haurren kasuan, 5 euro balioko du txartelak; ikasle eta langabetuek doan bazkaldu ahal izango dute). Bazkarian izena emateko 645 005 496 telefonora deitu beharko da, azaroaren 20a baino lehen.
HAIZEA eremua: Kultura herrikoiak, emakumeak. Dibertsitateak eta horizontaltasunak kultura herrikoien eta emakumeen esparruetan jasandako erresistentziei, adaptazio gaitasunei, eraldaketei egingo zaie mentzio. Ikasi eta desikasteari, elkar laguntzari, lotura afektiboei, ikasketa berrien irekitzeari…
URA eremua: Sexu-identitateak, irudizko mugak. Haurrentzako eta familientzako tailerrak egongo dira eremu honetan. Dibertsitateak sexu-identitateetan eta irudizko mugen bizitzeak. Bertan denak elkarrekin eta irudimena lagun dibertsitatea, ezberdin sentitzeko/pentsatzeko aukerei buruz, sexu-identitateei buruz, irudizko mugei buruz… jardungo gara. Sormen prozesu eta jolasen bitartez bizipenak partekatzeko parada izango da.
Sorburu Kooperatiba Feminista: 2014an Errenterian (Gipuzkoa) jaiotako kooperatiba feminista bat da. Amets errebelde ugari dituzte, zapaldutako edo disidente diren emakumeekin batera askatasun bideak elkarrekin egiteko. Bi dira euren estrategiak BOTERE TRANSFEMINISTA LIBERTARIO bati buruzko formazio kritikoa eta hiru espazio moten erraztea: indarkeria matxista transistemikoetatik biziraun dutenen autolaguntza feministarako espazioak; jatorri desberdineko emakume migranteen bateratze komunitariorako espazioak; emakume euskaldun eta migranteen arteko elkarrizketa interkultural eta multikulturalerako espazioak. Sorburuko sortzaileak bi feminista dira, Erdialdeko Amerikako hezkuntza herrikoi feministaren aberastasuna Gipuzkoako lurralde eta bizitzara egokituz ekartzen saiatu direnak. Uste dute posible dela bizi garen lurraldean (Gipuzkoan) bizimodu transfeminista libertarioa aurrera eramatea.
Garaipen Elkartea: Garaipen euskal herritar eta migratzaileen elkarte feminista Gipuzkoan jaio zen, 2002. urtean. Elkarte honek, 2006. urtez geroztik, iraultza feministarako hiru estrategia jarri zituen martxan: komunitate-laborategi autokonstituziogilearen lana, kolektibo politiko feminista gisa; emakume migratzaileen, euskal herritarren eta indarkeria matxistetatik bizirik atera direnen komunitateak sortzeko lana; eta Eskola Feminista, komunitate-prozesuak sortzeko. Feminismo deskolonial, desatriarkal eta antirrazista baten aurre-kontzepzioaren estela bat sortu du elkarte honen jardunak.
Ilusionista Sozialak: Ilusionista Sozialen Mintegia (ISM-UPV/EHU) ikerketa eta formazio taldea da. Gure lanaren gune nagusia bitartekaritza desiratuak dira, hau da, nola egiten/sentitzen/pentsatzen dugun bizi nahi dugun mundua, alegia, nola autogestionatzen dugun gure eguneroko bizitza, nola egiten garen gure bizitzaren protagonista, eta zehatzago, zein diren besteekin erlazionatzeko sustatzen ditugun moduak “pertsonen eta taldeen artean“ gure eguneroko bizitzari transzendentzia emateko, geure beharrak asetzeko, gure trebetasunak geure komunitateko gainerako jendearekin jokoan jarriz, gure inguru sozial eta naturalarekiko harmonian. Horretarako, jendeAREKIN eta jendeARENGANDIK lan egiten dugu (ez jendearengatik edo jendearentzat), ilusionismo sozialetik abiatuz. Ilusionismo soziala egiteko modu bat da (ez metodologia bat), jendearekin topatzeko modu bat, posible denaren segurtasunetik ezinezkoaren itxaropenera pasatzeko, eta kultura herrikoien konplexutasun komunitarioa da gure inspirazio iturri.
Naizen: Naizen adingabe transexualen familien elkartea da. 2015ean Euskal Autonomia Erkidegoko eta Nafarroako 8 familiek Chrysallis Euskal Herria sortu zuten. Egun 130 familia inguru gara eta 2019tik elkartearen izena Naizen da. Helburua, berriz, ez da aldatu, familien arteko babes-sarea sortzea eta gure seme-alaben errealitatea gizarteratzea. Horretarako hitzaldiak eta komunikabideetan agerpenak erabiltzen ditugu. Gainera, eragile sozial eta politikoekin lanean ari gara gure haurrek beste haurrek dituzten eskubide berdinak izan ditzaten.
Ventana a la Diversidad (VEDI): VEDIk, teknologi berri, artea eta sorkuntza bidez munduko gazteak elkartzen dituen plataforma da. Gazteen gaitasunak indartzeko ahalbideratua dago. Modu horretan, aniztasun (kulturala, sexuala..) bakearen kulturan eta eskubideen aldarrian aldaketa baikorren giza ardatz bihurtzeko bidean jarriaz.
Haziak: Haziak egitasmoaren helburua botere harremanak atzemateko bizipenak eta baliabideak sortzea da. Hala dihardu 2015. urtetik ona Oiartzun herriko hezkuntza formala eta ez formalean dinamikak burutzen. Sorkuntza prozesuak oinarri dituzten dinamikak sortzen; adierazpen kultural desberdinekin adierazpen kolektiboak bideratzen (gorputz mugimendua, ipuinen sorkuntza, musika, marrazkia...); adin, genero eta jatorri desberdinetako pertsonekin bizipenak partekatzen, material anitza sortzen eta herriko eragileen artean elkarlana uztartzen.
Ondorengo eremuak bete. "*" dutenak derrigorrez bete behar dira.
2016 · Haziak
Creative Commons BY-NC-SA 3.0
Webgune honetan dagoen edukia kopiatu, banatu, lan eratorriak sortu eta jendaurrean zabal ditzakezu, beti ere egiletza aitortuz eta baldintza beretan egiten baduzu.